Cunha altitude media de 145 metros, San Paio é unha das parroquias menos accidentadas do concello de Coristanco.
 
Ben abastecida de auga polo río Vao, resultado da xuntanza dos regos Loureiro e Rabuxenta, e ó pesar da súa planicie, non son abundantes nesta zona os terreos lamacentos nin as brañas, o que propicia un amplo aproveitamento agrícola. Nas escasas zonas forestais os piñeiros e eucaliptos son as especies máis abundantes, seguidas moi de lonxe por carballos e castiñeiras.

A confluencia en San Paio da estrada C-552 de Coruña a Fisterra e a que leva hacia Santa Comba e Muros, fai que sexa a parroquia mellor comunicada do concello, que xa na Idade Media era surcada por un camiño real.

Cada 15 de Xaneiro San Paio celebra a súa festividade patronal e recibe ós veciños que, atraídos pola fama como avogado contra os problemas de osos do patrón, achéganse de tódalas partes da provincia.